BUTUAN CITY – Activated na karong adlawa ang Overall Command Center sa National Grid Corporation of the Philippines kon NGCP alang sa eleksyon ugmang adlawa, Lunes, Mayo 12.
Sumala pa ni Kristoffer Abellanosa, ang regional communications and public affairs officer sa NGCP-Mindanao, langkuban kini sa mga technicians ug mga engineers kinsa i-position sa mga strategic locations uban sa ilang Quick Response team nga langkuban usab sa mga linemen nga maoy mu-ayo higayong duna’y mga kakulian sa kuryente ilabina kung aduna’y brownout sa mismong adlaw sa eleksyon.
Una nang nakig-alayon ang NGCP sa Commission on Election kon COMELEC niadto pang Pebrero alang sa Power Task Force Election, kansa mao ang special team sa NGCP nga maoy magsiguro sa power distribution ugmang adlawa.
Gipaniguro sa opisyal nga walay angay kabalak-an sa kuryente ugmang adlawa,tungod kay maayo matud pa ang updated power outlook sa Pilipinas.
Pasalig niini nga dunay igong supply sa kuryente karong piniliay ug gisuspende na nila ang maintenance activities sukad pa niadtong Mayo 5 hangtud 16.
