BUTUAN CITY – Eksklusibong gipa-ambit sa Bombo Radyo Philippines ni kanhi Department of Interior and Local Government kon DILG Sec. Mar Roxas ang gikuhaan sa tinuod nga pangalan sa kaluhang anak nila ni Korina Sanchez nga sila Pepe og Pilar.
Dili matukib ang kalipay nga gibati sa kanhi opisyal dihang gibutyag niining dakong kalipay ang hatud sa kaluha ngadto sa ilang duha sa iyang asawa ilabina nga wala na siya magdahom pang makabaton sila og anak.
Bisan og kapoy tungod kay hands on sila sa pag-atiman sa ilang mga anak sama sa pagpadede og pag-ilis og diaper apan aminado si Mar nga enjoy nilang gihimo ni Korina ang ilang obligasyon ngadto sa ilang kaluha.
Gipasabot sa kanhi kalihim nga ang babaye ilang ginganlan og Pilar Judy Celia nga kuha gikan sa pangalan sa iyang Mama Judy samtang ang Celia kuha usab gikan sa inahan sa iyang asawang si Korina.
Dihang gipangutana kalabot sa ideya nganong Pinoy og Pinay kaayo ang pangalan sa duruha, gipasabot sa kanhi senador nga sa sinugdanan, mao lang kini ang ilang gidagnay kanila apan dihang nag-fill up na sila sa birth certificate sa duha, ila na kining gi-apil sa ilang tinuod nga pangalan.
Samtang ang lalaki ilang gipanganlan og Pepe Ramon Gerardo nga kuha gikan sa pangalan sa amahan sa iyang asawa nga si Ramon og gisundan sa pangalang Gerardo sa iyang amahan dungan sa pagpasabot nga ila kining gituyo aron kanunay nga makabit sa duha ang pangalan usab sa ilang mga apuhan sa duha ka kaliwatan.
