BUTUAN CITY – Planong muhimo og legal nga lakang ang pamilya Buyante og Dacera batuk sa organizer sa tinuig nga beauty pageant nga Bae Naliyagan 2018 sa lalawigan sa Agusan del Sur human gi-disqualify ang kandidatang lumad sa lungsod sa La Paz, Agusan Del Sur nga si Hershey Gail Buyante Dacera tungod lang sa isyu sa height.
Sa eksklusibong pakighinabi sa Bombo Radyo Butuan, gibutyag ni Jerek Miñoza Buyante, kabanay ni Dacera, hilabihan ang kasakit nga ilang gibati tungod kay dili ti-aw ang epekto niini ngadto sa maong kandidata kinsa mutuyo lang pagpa-uli gikan sa General Santos City diin kini nagtungha aron lang mutambong sa mga pre-pageant activities.
Dismayado sila dihang kalit lang gibutyag sa tigpamaba sa probinsyal nga panggamhanan nga wala matud pa kini naka-abot sa gi-require nilang 5”4′ nga height taliwa nga wala sila gipahibalo kalabot niini.
Aron matubag kini nga isyu, nagpasukod si Dacera sa iyang height ngadto sa police station sa GenSan diin nasuta nga naka-abot kini sa gi-require nilang height kondiin ang pagsukod gikuhaan pa og hulagway og gipadala ngadto sa organizer.
Misamot ang ilang kadismaya dihang gibutyag sa organizer nga wala kini naka-apil sa photo shoot taliwa nga na-post na sa Facebook account sa Naliyagan ang mga hulagway niini ka-uban ang laing mga kandidata.
Sa pagkakaron, nakig-estorya na sila sa usa ka abogado ug Human Rights group ingon man sa mga Indigenous People kon IPS alang sa posibleng legal nga aksyong ilang himuon. (Rolan Janea)
