BUTUAN CITY – Wala’y nakuhang kontrabado ilabina ilegal nga druga ang mga sakop sa Butuan City Police Office Drug Enforcement Group sa ilang gilusad nga Operation Greyhound kon Oplan Galugad sa 11 ka mga selda sa Agusan del Norte Provincial Jail nga duna’y 140 ka mga living spacers kon mga piniriso.
Gikalipay kini ni jail warden Fermin Antenorio dungan sa pagklaro nga dili kini bag-o alang kanila tungod kay sa pila ka higayong gilusad ang susamang operasyon, wala’y nakuhang ilegal nga druga ang mga operatiba sa kapulisan apil na sa Philippine Drug Enforcement Agency kon PDEA-Caraga.
Sa eksklusibong pakighinabi sa Bombo Radyo Butuan, gibutyag ni Antenorio nga kada-adlaw magpahigayon og susamang operasyon ang ilang jail personnel tungod kay kini matud pa ang iyang target sukad pa sa iyang panglingkod sa katungdanan.
Gipasabot pa ni Antenorio nga dili sayon ang iyang paningkamot nga mahimong hapsay ug hamugaway ang jail premises ilabina ang sitwasyon sa mga living spacers diha sa ilang selda.
Dihang gi-assign matud pa siya sa provincial government sa maong pasilidad, mihimo gilayon siya og awareness program kondiin iyang gipasabot ngadto sa mga piniriso ang mga nagtunhay nga palisiya nga iya lang gihataganog ngipon kon gipatuman og insakto ug wala na dugangi pa.
Ang maong kabag-uhan miresulta sa gilusad kaniadtong noise barrage apan dihang nasabtan na sa mga living spacers ang iyang gustong mapatuman, gi-adaptar na kini sa tanan.
