BUTUAN CITY – Gipatuman na kaganinang alas-sais sa buntag ang ikaduhang hugna sa oil price hike sa mga kompanya sa lana sa Pilipinas alang lamang ning semanaha.
Subay niini, ang presyo sa gasolina mi-usbaw og ₱1.75 kada-litro, samtang ₱2.60 usab sa kada-litro sa diesel, ug ₱2.40 sa kerosene, sama sa unang tranche sa usbaw niadtong Martes Hunyo 24.
Sa kinatibuk-an, misaka ang presyo sa gasolina og ₱3.50 kada-litro karong semanaha, samtang ang diesel adunay usbaw nga P5.20 matag- litro ug ang kerosene misaka og ₱4.80 matag litro.
Ang Department of Energy nakigtambayayong sa mga oil firms aron tigi-tigion ang pag-usbaw, sa ingon dili kaayo mabug-atan ang mga konsumidor.
Ang hinungdan sa maong pagsaka mao ang padayon nga pagsaka sa presyo sa lana sa world market, ilabina tungod sa kagubot sa Middle East.
