BUTUAN CITY – Ubay-ubay nga mga election campaign materials ning siyudad sa Butuan ang nabaklas sa mga personahe sa Commission on Elections kon COMELEC-Caraga pagpanguna ni regional director Atty. Francisco Pobe uban nila Butuan City election officer Atty. Tristan Niog ug Agusan del Norte election supervisor Atty. April Joy Balano.
Pinakadaghang nabaklas nga mga campaign materials sa may Brgy. Bayanihan kondiin ang mga posters sa usa ka grupo nga mikandidato pagka-Sangguniang Kabataan kon SK chairman ug kagawad tungod sa kawala’y nabutang nga grupo o kaha indibdiwal nga mibayad sa ilang posters.
Duna usa’y gipangbaklas sa may Brgy. Bancasi, Libertad ug Ampayon tungod kay ang uban, milapas sa required nga sukod samtang ang uban milapas na sa designated common poster areas.
Duna matud pa’y uban nga gipangpilit sa pribadong lugar nga wala nila gibaklas tungod kay sakto man ang sukod sa mga niini.
Gawas pa, dili nila makwestyon ang kagustuhan sa pribadong luna kung butangan niya kini og campaign material sa gusto niining kandidato.
