BUTUAN CITY – Temporaryong gipasuspende sa Office of the City Mayor sa Bislig City, lalawigan sa Surigao del Sur ang operasyon sa Tinuy-an Falls tungod sa yellow rainfall warning nga gi-isyu sa Philippine Atmospheric, Geophysical and Astronomical Services Administration (PAGASA).
Mugna sa igo-igo ngadto sa kusog nga mga pag-ulan nga posibleng muresulta sa kalit nga pagbaha ug pagdahili sa yuta tungod sa nagtunhay nga shearline kansa delikado alang sa mga bisita ug mga residente.
Tungod sa gi-isyu nga Memorandum Order No. 2026-176 kaganina, temporaryong suspendido ang mga operasyon ug mga tourist activities sa Tinuy-an Falls epektibo ning adlawa hangtud sa panahon nga makapagawas sila og bag-ong kamanduan.
Tumong niini nga malikayan ang mga posibleng aksidente ug masiguro ang kaluwasan sa publiko samtang daut pa ang panahon.
Gimanduan usab ang tanang hingtungdang ahensya sa kagamhanan ingon man ang ilang mga personahe nga hugot nga ipatuman kini nga advisory ug mutabang sa saktong pagpahibalo sa mga bisita ug mga turista.
