BUTUAN CITY – Temporaryong isuspende sugod karong Lunes, Septembre 21 ang tanang serbisyong ginahatag sa Out-Patient Department sa Adela Serra Ty Memorial Medical Center sa Tandag City, lalawigan sa Surigao del Sur.
Kini base na sa gipagawas nga public advisory 005-2020 kagahapon nga pirmado ni Dr. Janice Pagaran-Alcordo, ang OIC Medical Center Chief.
Kabahin kini sa ilang BIDA Solusyon kontra COVID-19 kondiin muhimo sila og disinfection ug ipahibalo lang nila kung kanus-a mubalik ang ilang operasyon.
Tungod niini, mihangyo og pagsabot ug kooperasyon ang kadumalahan sa maong ospital tungod kay gipaningkamutan lamang nila nga mahatag ang pinaka-maayong serbisyo bisan ning panahon nga anaa sa estado nga health emergency ang nasud.
Apan alang niadtong nanginahanglan og medical consultation, mamahimo gihapong mu-avail sa ilang libreng online medical consultation pinaagi sa ilang ASTMMC Telemedicine nga available gikan sa adlaw’ng Lunes hangtud Sabado gikan sa alas-otso sa buntag ngadto na sa alas-singko sa hapon.
Kagahapon isip kabahin sa ilang COVID-19 surge plan, gisugdan na usab nila pagbalhin ang ilang mga Non-COVID19 patients aron ilang magait ug ma-andam ang ospital alang sa bisan posibleng pagsaka pa sa mudagsa nga mga COVID-19 patients.
Ang mga non-COVID patients temporaryong gibutang sa Gov. Vicente T. Pimentel Jr. Social Hall isip extension sa ilang Pedia ug OB non-COVID19 ward.
Gidayeg usab sa kadumalahan sa ospital ang ilang mga empleyado ilabina ang ilang mga frontliners tungod sa ilang kapursigidong isakripisyo ang ilang kaluwasan taliwa sa sitwasyong gi-atubang karon sa maong ospital.
