BUTUAN CITY – Tumang pagpangandam na ang gihimo sa mga Olympic organizer sa Paris Olympics 2024 alang sa umalabot nga debut sa bag-ong Olympic sports nga gitawag nga ‘Breaking’ o ‘Breakdance’.
Ablihan sa maong Olympic sports ang duha ka mga events kondiin ang usa alang sa mga babaye nga gitawag usab nga B-girls, ug ang alang sa mga lalakin nga tawagon usab nga B-boys.
Sumala sa mga organizers, ang matag event awayan sa 16 ka mga contestants nga usa-usang magtigi. Dungan silang manayaw pinaagi sa patugtugong kanta sa disk jockey(DJ).
Lantawon ang mga skills sa mga contestants pinaagi sa mga breakdance steps, sama sa windmill, six-steps, freezes, ug uban pa. Magsumikad ang evaluation sa mga hurado sa unom ka criteria sama sa creativity, personality, technique, variety, performativity, ug musicality.
Ning-agi usab sa tulo ka mga world competitions ang nasangpit nga mga atleta ug dancers adiser ning-qualify sa olimpyada. Una nang nasulod ang Breaking sa Summer Youth Olympic Games sa Buenos Aires niadtung 2018. Sumala sa mga organizer, himoon ang Breaking karong August 9 ug 10 sa Place de la Concorde.
