Olitawo nga naligo lang sa atabay sa tugkaran sa ilang panimalay sa Agusan Del Sur, gipusil patay

BUTUAN CITY – Padayon karung gigukod sa kapulisan sa Loreto, Agusan Del Sur ang suspetsadong riding-in-tandem nga mipusil patay sa ka olitawo nga naligo lang sa atabay.

Sa nakuhang impormasyon sa newsteam, naila ang biktima nga si Janilo Fuentes, 35-anyos, olitawo, maguuma ug residente sa P-5, Sta. Teresa, Loreto sa maong probinsiya.

Mga bandang alas 10:30 sa buntag sa dihang naligo ang biktima sa atabay nga anaa lang sa tugkaran sa ilang panimalay sa dihang kalit nga gihunongan sa usa ka single motor nga dunay sakay nga duha katawo ug gipusil.

Ang igo sa dughan ang hinungdan sa hinanaling kamatayon sa biktima. Samtang ang mga suspetsado daling misibat sa wala matino nga direksiyun.