BUTUAN CITY – Usa lang ka bus driver ning siyudad sa Butuan gikan sa 107 ka mga bus drivers ug conductors nga gipa-ilalom sa random drug test ang nagpositibo sa ilegal nga druga atol sa gipahigahong Oplan Harabas kaganinang buntag.
Kini subay na sa tinguha sa nasudnong kagamhanan nga luwas nga makabiyahe ang mga pasahero padulong sa ilang gigikanang mga probinsya ug pabalik sa ilang trabaho atol sa pagsa-ulog sa kalag-kalag.
Sigon ni Dindo Abellanosa, tigpamaba sa Philippine Drug Enforcement Agency kon PDEA-Caraga, mi-abot sa 52 ka mga bus drivers ug conductors sa may Robinson’s terminal ang ilang gi-drug test samtang 55 usab sa may Langihan Premium Bus Terminal diin na-trace ang nagpositibong driver.
Dali gilayon kining gipa-ilalom sa advocacy lecture ug gisultihan sa consequences nga iyang sangputan ug kini mao ang temporaryong pag-hold sa iyang driver’s license.
Gipasabot ni Abellanosa nga tumong sa ilang gilusad nga Oplan Harabas nga matabangan ang mga drivers ug conductors nga matambalan human nalambigit sa paggamit og ilegal nga druga.
Gawas niini, kinahanglan usab ang luwas nga pagbiyahe sa tanang mga bus units padulong sa bisan asang bahin sa Mindanao ug pabalik dinhi sa dakbayan sa Butuan.
