BUTUAN CITY – Gitawag ni Senador Rodante Marcoleta si Orly Guteza nga “most credible witness” nga gipresenta sa Senate Blue Ribbon Committee nga iya nang gipangunahan kaniadto tungod kay siya ra ang nakatumbok sa pangalan ug nakakonekta kang kanhi Ako Bicol Party List Representative Zaldy Co ug kanhi House Speaker Martin Romualdez.
Sa iyang speech sa INC rally sa Quirino Grandstand kagahapon, gisaway ni Marcoleta ang mga nag-akusa kang Guteza nga peke ang notaryo sa iyang testimonya sa Senado kansa gigamit nga rason aron matu-is ang tinuod nga isyu nga gi-tumbok ni Guteza sa iyang testimonya.
Gidepensahan usab ni Marcoleta ang magti-ayong Curlee ug Sara Discaya nga boluntaryong mitumbok sa pangalanan sa mga tawong nagpaluyo sa mga amunalusong public infrastructure projects nga nagbutang kanila ug sa ilang pamilya ngadto sa peligro.
Wala pa’y lipod-lipod nga gitumbok sa Senador nga nga gisulayan matud pa ni kanhi Justice Secretary Jesus Crispin Remulla nga pugngan ang pag-apil sa mga Discaya sa Witness Protection Program (WPP) pinaagi sa pag-demand nga i-uli nila ang mga kwarta nga ilang gi-angkon.
Sigon ni Marcoleta, dili kinahanglan ang pag-comply sa maong requirement sa proseso pa lang sa aplikasyon aron ma-apil sa programa, tungod kay wala kini nakalatid sa balaod, hinuon paagi matud pa kini ni Remulla aron dili mapatuman ang transparency.
Gipamugos usab ni Marcoleta sa mga nagbutyag nga artificial intelligence (AI) ra ang video nga gipagawas ni Co tungod kay ang AI mahimo lang kung kini dili gikan sa official page sa kanhi magbabalaud.
Gibatikos usab niini ang Independent Commission for Infrastructure (ICI) tungod sa ilang wala pagpasabot sa publiko sa ilang mga pagdungog kansa gitago sa katawhan rason nga dili matud pa gayod makab-ot ang hustisyang gipangita sa tanang natikasan sa mga kawatan nga opisyal.
