BUTUAN CITY – Gipa-abot nalang sa Philippines Overseas Labor Office kon POLO sa Jordan ang medical certificate nga fit to travel na ang OFW nga kasamtangang nalandig sa balay tambalanan sa Amman, Jordan tungod sa iyang injuries sa tiil.
Sa eksklusibong pakighinabi sa Bombo Radyo Butuan kang Marjorie Majorenos, OFW advocate sa Jordan, gibutyag niining padayong gi-obserbahan sa embahada sa Pilipinas ang kahimtang ni Mary Grace Guinto nga taga Manila kinsa nakahi-agum ug piang sa iyang duha ka tiil human nga ni-ambak sa 2-andanas nga balay sa iyang employer.
Sumala ni Majorenos, usa ug tunga sa buwan pa lang nga nagtrabaho si Mary Grace sa iyang amo dihang nakasinati kini ug mild stroke hinungdan nga gidala siya sa iyang amo sa balay tambalanan.
Apan wala damha niadtong Nobyembre 8 dihang nahitabo ang insidente nga nagresulta sa pagkapi-ang sa iyang duha ka tiil.
Sa karon gipaabot na lang ang medical certificate aron mahikay na ang papeles sa biktima pagpauli sa nasud.
Sa pikas bahin sa pakighinabi ning sibyahan, nikumitar nga tubagon sa recruitment agency ni Mary Grace Guinto nga Golden Legacy Job Movers Corporation ang ilang responsibilidad ug sa kasamtangan nagpahigayon pa sila ug imbestigasyon sa maong insidente.
