BUTUAN CITY – Planong pasakaan og kaso ang Office of the House Secretary General human wala dawata kagahapon ang duha ka sunod-sunod nga impeachment complaint batuk kang Pangulong Ferdinand Marcos Jr.
Ang maong mga reklamo giduso sa grupo sa Bagong Alyansang Makabayan kon Bayan ug sa grupo nila kanhi Anak Kalusugan partylist Rep Mike Defensor kansa wala dawata tungod kay wala’y gibilin nga otorisadong mudawat niini human nga atua sa Taiwan si House Secretary General Cheloy Garafil aron pagdawat matud pa og award.
Mipalag si Defensor tungod kay wala man lang sila gipasulat sa logbook isip timaan sa ilang pagdalikyat sa maong buhatan ilabina nga katungod sa tanan ang pagduso og reklamo gawas nga wala usab nakalatid sa Konstitusyon nga kinahanglang ang House Secretary General gayod ang mudawat niini.
Tungod niini, hisgutan pa sa ilang grupo kung subli nila kining iduso karong Lunes.
