BUTUAN CITY – Naka-standby na ang mga personahe sa mga Provincial Disaster Risk Reduction and Management Offices sa mga lalawigan sa Caraga Region nga gipa-ilalom na sa blue alert status sugod niadtong mi-aging adlaw tungod sa bagyong Ada gawas lang sa Agusan del Sur nga mao lama’y anaa sa white alert.
Sigon ni Carlo Becera, tigpamaba sa Office of the Civil Defence kon OCD-Caraga, ubos sa blue alert status, muresponde gilayon ang mga disaster personnel sa mga lugar nga duna’y emerhensyang mahitabo ilabina niadtong ma-igo sa mga pagbaha tungod sa pila ka adlaw nga mga pag-ulan o kaha mga pagdahili sa yuta.
Aron masiguro ang kaluwasan sa tanan, nagpagawas og memorandum ang Caraga Regional Disaster Risk Reduction and Management Council kon Caraga RDRRMC ngadto sa tanang mga local DRRMCs nga magbinantayon sa kanunay samtang anaa pa ang mga hulga nga dala sa maong bagyo.
