BUTUAN CITY – Nasikop sa ginsakpan sa Drug Enforcement Unit sa Butuan City Police Station-1 ang usa bag-ong natumbong nga street level drug personality sa gilusad nga drug buy-bust operation kaganinang alas-2:52 sa kaadlawon sa Purok-5B, Barangay Baan Riverside, ning siyudad sa Butuan.
Naila ang dinakpan nga si alyas “Boss,” 32-anyos, ulitawo usa ka construction worker, ug residente sa Purok-3, Barangay Mahogany, ning siyduad.
Daling gihimo ang body search human nakapalit kaniya ang usa ka poseur-buyer og usa ka plastic sachet sa gidudahang shabu nga maoy buy-bust item ug dinhi na nakuha gikan kaniya ang usa ka pakete sa sigarilyo nga duna’y sulod nga upat ka sachets sa susamang epektos, buy bust money nga ₱500.00 ug motorsiklo nga gipanag-iyahan usab sa suspetsado.
Ang nakumpiskang gidudahang shabu mitimbang og 3-gramos ug gibana-banang nagkantidad og ₱20,400.00.
Anaa na sa kostudiya sa Station 1 ang dinakpan apil na ang mga nakumpiskang drug ug non-drug evidence alang sa tukmang dokumentasyon ug disposasyon.
