BUTUAN CITY – Hugtanong gikwestiyon ni National Police Commission (NAPOLCOM) VCEO ug Commissioner nga si Atty. Rafael Vicente Calinisan ang pagpasaka og kaso nga reckless imprudence resulting to homicide batok sa driver sa usa ka Sedan, may kalabotan sa pagkahulog ang usa ka estudyante sa may EDSA Northbound.
Sumala ni Calinisan, unsaon pagtan-aw nga homicide ang usa ka insidente kung ang biktima wala namatay tungod sa pagkaligis kundili tungod sa pagkahulog gikan sa ikatulong andana sa LRT‑1 Fernando Poe Jr. Station sa Barangay Ramon Magsaysay, Quezon City, dayong butyag nga ang sayop nga aplikasyon sa balaod dili lang basta sayop—kondili dayag nga pagtu-is sa prinsipyo sa hustisya.
Gibarugan usab sa opisyal nga ang pagpasaka og kaso batok sa usa ka inosenteng tawo supak sa tinuod nga pagpatuman sa balaod.
Tungod niini, gipahibalo sa NAPOLCOM nga sugdan na ang masjuting pagtuon ug reporma sa kasamtangang traffic procedures aron masiguro nga ang matag-lakang sa mga otoridad mouhaom sa balaod, ebidensya, ug hustisya.
Taliwala sa kontrobersiya, nanawagan ang komisyon alang sa mas klaro, makatarunganon, ug responsableng pagpatuman sa mga balaod trapiko—aron ang hustisya dili lang mahatag, kondili tinuod nga mapatuman.
