BUTUAN CITY – Misangpot sa pagkapatay usa ka notado nga New People’s Army kon NPA leader ug pagkasikop sa laing 2 ang gihimong law enforcement operation sa hini-usang pwersa sa Armed Forces of Philippines kon AFP ug kapulisan didto sa Km. 16, Brgy. Don Alejandro, San Luis, Agusan del Sur, ning mi-aging gabii.
Pasado alas 10:30 sa gabie, usa ka squad gikan sa 26th Infantry Battalion, Philippien Army uban ang ginsakpan sa San Luis Municipal Police Station pagpanguna ni PCaptain Kristopher Niel Nono, ang nag-serve og arrest warrant ngadto sa usa ka Ronnie Rocero alyas Opaw, vice commander sa Militia ng Bayan sa NPA kinsa acting vice squad leader usab sa Platoon 2, Guerilla Front 88 sa North Central Mindanao Regional Committee.
Gipabuthan matud pa sila sa wala matinong ihap sa mga rebeldeng NPA samtang padulong sa bisinidad sa target, hinungdang napugos ang tropa pagbalos resulta sa 5-minutos nga engkwentro resulta sa pagsibat sa mga rebelde sa managlahing direksyon og pagkarekober sa patay’ng lawas ni alyas Opaw ug pagkasikop sa samdang anak niining si Marjun Rocero ug laing usa nga si Eric Acita.
Nakarekober ang tropa ug tag-usa ka KG9 sub machine gun pistol ug kalibre 45 nga pistola ug duha ka mga hand grenades.
Nasuta sa imbestrigasyon nga si alyas Opaw, top most wanted nga rebeldeng NPA tungod sa paghigayon og sunod-sunod nga pintas ug ngilngig nga pagpamatay sa mga indigenous people’s kon IP leaders nga wala misuporta sa mga kampanya sa walhong grupo.
Siya usab ang gitudlo nga usa sa mga personalidad nga nanguna sa pagpatay kang Punong Barangay Robincio Salamorin sa Brgy. San Pedro, San Luis, Agusan del Sur niadtong Pebrero 27, 2019.
