BUTUAN CITY – Serviceable pa gihapon ang duha ka mga bag-ong patrol cars nga gipalit sa lokal nga kagamhanan sa Surigao City alang unta sa ilang police station human gipabuthan og improvised explosive device dihang i-deliver na unta gikan sa gipalitan niining kompanya sa Bicutan, Taguig City.
Sigon ni PLCol Christian Rafols – tigpamaba sa Police Regional Office (PRO) 13, gimanehuan ang maong mga sakyanan padulong unta sa Surigao City apan pag-abot nila sa Pinabacdao, Samar Province pasado alas-10:30 ning mi-aging gabii, kalit na lang nga duna’y mibusikad rason nga na-igo ang pipila ka parte sa maong mga sakyanan..
Sa eksklusibong pakighinabi sa Bombo Radyo Butuan, gipadayag ni Rafols nga bisan og tumang kahadlok ang ilang gibati, nahimo pa gihapon sa mga drivers nga sila Rustom Polican Patagan, 42 anyos, minyo, residente sa Bagong Tanyas, Taguig City Lauro Miravelles Salesi III, 45 anyos, minyo, residente sa 98 Bedena St. San Nicolas, Pasig City ug parehong trabahante sa Toyota, ang paspas nga pagpadagan niini hangtud nga naka-abot sila sa Brgy. San Isidro, Sta. Rita, Samar pasado ala-1:30 na sa kaadlawon.
Gibiyaan nila ang mga patrol cars ug midalikyat sa San Juan detachment aron i-report ang maong insidente.
Anaa na sa kustodiya sa Sta. Rita Municipal Police Station ang mga drivers alang sa ilang seguridad samtang anaa usab sa Brgy. San Isidro ang mga sasakyan nga gibantayan sa mga barangay officials.
