BUTUAN CITY – Gikumpirma ni Gilbert Buenafe, regional director sa Philippine Drug Enforcement Agency kon PDEA-13 nga napatay nila ang notorius nga drug lord sa Caraga region sa ilang operasyon sa mismong safehouse niini sa Barangay Kauswagan, Cagayan de Oro City kagahapon sa alas 3:00 sa hapon.
Sigon ni Buenafe sa pakighinabi ning sibyahan, nahibalo na silang daan nga dili magpadakop nga buhi ang suspetsadong si Jabar Sangcopan ug sa dihang ila nang gisulod ang panimalay niini, misukol ang suspek hinungdang ila kining napatay.
Gibutyag pa sa opisyal nga 10 ka tuig nilang gi-monitor ang lihok ni Sangcopan may kalabutan na sa pagpayuhot sa ginadiling drugas sa Caraga Region, Cagayan de oro City, Lanao Area ug Marawi.
i-angkon pa ni Buenafe nga naglisud sila sa pagsikop sa suspek tungod sa kadaghan niining gi-estarang panimalay gawas pa sa kapin 20 ka sakyanan nga maghatud-sundo kaniya.
Sa pagkutlo ning balita samtang nagpadayon pa ang pagsuhid sa 3 storey nga pinuy-anan niini, dili mo-ubos sa 50 gramos na ang nakuhang epektus apil na ang usa ka pistola.
Nasayran usab nga daghang operasyon na ning siyudad sa Butuan ang gilusad batuk kang Sancopan, apan ang iyang mga tawo lang ang masikop.
Sa karun, gihawiran na sa usab sa PDEA ang asawa sa suspected druglord human gisulod ang usa pa ka safehouse niini sa lungsod sa Opol, Misamis Oriental.
Mi-abag sa maong operasyon ang PDEA-region 10 ug Cagayan De Oro Police.
