BUTUAN CITY – Gihikay na ang mga dokumento alang sa pagbiyahe sa No. 2 most wanted person ning rehiyon sa Caraga nga nasikop sa probinsya sa Cebu.
Sigon ni PCol Christian Rafols – tigpamaba sa Police Regional Office kon PRO13, ang suspek nga si Ambrosio Montañez Jr. alyas Datu Udjotan, nasikop sa hini-usang operasyon sa PRO 13 ug PRO-7 didto sa Lawaan 1, Brgy. Linaw, Talisay City, Cebu.
Nasayrang nag-atubang si Montañez og kasong pagpatay kang Barangay Captain Martino Ala sa Brgy. Pantukan, lungsod sa Carrascal, Surigao del Sur ug Henry Dagodoy, tungod sa inilugay matud pa nila sa 1% royalty share sa usa ka mining company sa Carrascal, Surigao del Sur.
Ang suspek usab ang gitudlong responsable sa pagpang-hostage sa 20 ka empleyado sa Carrascal Nickel Corporation sa lungsod sa Carrascal niadtong Mayo 11, 2015.
Sigon ni Rafols, nagmalampuson ang pagkasikop sa Number 2 most wanted tungod sa pagpakabana sa katawhan rason nga mapasalamaton ang kadumalahan sa PRO-13 dayong awhag sa katawhan nga manginlabot aron makab-ot ang ti-unay nga kalinaw sa komunidad.
Gikustodiya si Montañez sa custodial facility sa Talisay City Police Station ang suspek naghulat pa sa pwersa sa PRO-13 alang sa pagbalik niini dinhi sa Caraga Region aron mapatim-aw ngadto sa issuing court sa lungsod sa Cantilan, Surigao del Sur.
