BUTUAN CITY – Gi-anunsiyo sa International Criminal Court kon ICC nga gitudlo isip mahimong legal counsel ni kanhe Pangulong Rodrigo Duterte si Nicholas Kaufman.
Base sa gipagawas nilang dokumento nga nakapulong sa ICC registry ang kanhe pangulo niadtong Marso 17 ug gikumpirma ang pagtudlo sa British-Israeli lawyer.
Sa nasangpit nga adlaw na usab gidawat ni Kaufman ang maong pagtudlo kaniya.
Si Kaufman duna nay 34 ka tuig nga kasinatian sa international law diin katapusan nga nahimong abogado kini ni kanhe Congo Vice President Jean Pierre Bemba ug kanhe Central African Republic (CAR) minister Maxime Mokom.
Una nang gibutyag ni Kaufman nga seguruhon niyang makabaton og lig-on nga depensa ang kanhe pangulo ug gi-angkon niyang padayon ang pagmugna sa legal team.
