BUTUAN CITY – Nagpadala og technical assistance ang National Grid Corporation of the Philippines kon NGCP-Caraga alang sa restoration effort nga gihimo sa Siargao Island, tungod sa pagkaputol sa submarine cable sa Siargao Island Electric Cooperative kon SIARELCO niadtong Dominggo ug wala pa mubalik ang linya sa kuryente hangtud ning mga taknaa.
Kini ang rason nga nagduso karon og resolusyon ang probinsyal nga panggamhanan nga magdeklara og state of calamity tungod sa gikabalak-ang krisis sa kuryente pagpanguna nila Gov Robert Lyndon Barbers ug Vice Gov Geed Gokiangkee ug mga opisyal sa probinsya.
Sa eksklusibong pakighinabi sa Bombo Radyo Butuan, gibutyag ni National Grid Corporation of the Philippines kon NGCP spokesperson Kristoffer Abellanosa nga wala’y problema ang ilang transmission line facilities sa maong lalawigan.
Sa pagkakaron nasubay na sa team sa ilang mga engineers ug linemen ang fault location diin naputol ang submarine cable nga maoy ila nang padayong gi-restore.
