₱936.5 milyon, kita sa NFA gikan sa gisubastang bugas

BUTUAN CITY – Nakakolekta ang National Food Authority (NFA) og ₱936.5 milyon nga kita gikan sa gihimong subasta sa mga natigom nga bugas kansa mas taas kaysa ilang target nga P912.4-M kondiin nabaligya sa auction ang kapin 90 porsyento sa dugay nang natigom nga bugas.

Tumong sa maong auction aron malu-ag ang ilang mga bodega tungod kay hapit na ang panahon sa ani.

Sumala sa NFA, nakabaligya sila og 32.5 milyon ka kilo nga bugas nga adunay average nga presyo nga P28.00 matag kilo.

Hugot nga gisusi sa NFA ang mga dokumento sa mga bidders sa dili pa mapinalisar ang mga kontrata sa pagbaligya tungod kay mi-abot kini og hapit 740-K nga mga sako nga natigom sulod sa tulo hangtod 18 ka bulan.