BUTUAN CITY – Nagpasa sa iyang irrevocable resignation si National Bureau of Investigation (NBI) director Jaime Santiago ngadto kang Pangulong Ferdinand Marcos pinaagi ni Executive Secretary Lucas Bersamin, kondiin iyang gibutyag nga mubiya siya sa puwesto kung adunay na’y itudlo nga mopuli kaniya.
Gipadayag usab niya sa sulat nga dili na niya makaya ang mga intriga ug pagpangdaut batok kaniya nga nagsugod dihang mipasa siya sa iyang courtesy resignation kauban sa pipila ka opisyal sa gobyerno, human gimando ni Pangulong Bongbong Marcos.
Nagpasalamat siya sa administrasyong Marcos ug nagsiguro nga magpadayon gihapon ang iyang suporta niini.
Madumdumang dihang gidawat niya ang maong trabaho, gisiguro niya nga iyang limpyohan ang ahensya batok sa mga scalawags apan tungod sa pagpangdaut sa iyang imahe tungod sa mga tawo nga interesado sa iyang puwesto, iya na kining biyaan.
Si Santiago, nahimo kaniadtong trial court judge, prosecutor, ug pulis sa Manila ug gitudlo isip NBI Chief niadtong Hunyo ning miaging tuig.
