BUTUAN CITY – Nagpadayon karong adlawa ang Department of Education kon DepEd dinhi sa dakbayan sa Butuan ang tulo ka adlaw nga National Planning Conference 2026 nga gisugdan kagahapon ug gisalmutan sa kapin 600 ka mga partisipante gikan sa 18 ka mga DepEd regions sa entiro nasud.
Sa eksklusibong pakighinabi sa Bombo Radyo Butuan, gipadayag ni regional spokesperson Pedro Tecson nga gihi-usa sa konperensya ang mga DepEd central, regional, ug division officials, uban sa mga representante gikan sa mga local government units, pribadong sektor, development institutions, ingon man policy and research organizations.
Nagsilbi matud pa kining venue alang sa pagpa-ambit sa mga expertise, mga kasinatian ingon man commitment ngadto sa pagpalambo sa edukasyon alang sa mga Filipino learners.
Usa usab kini ka higayon aron mapalambo ang mga plano ug mga estratihiya samtang gipaningkamutan ang malahutayong partnerships alang sa quality, inclusive, ug responsive education.
Ang malampuson matud pa nga education planning mag-agad dili lang sa mga technical discussions apan apil na sa tinud-anay sa kooperasyon tali sa mga stakeholders.
Gila-uman usab ang pagsalmot sa mga partisipante sa himuong mga focused discussions, pagpa-ambit sa ilang mga best practices, ingon man paghatag og mga ideya nga maggiya alang sa paghimo og mga palisiya ug programa alang sa umalabot nga katu-igan.
Gidugang ni Tecson nga dili apil sa agenda sa tulo ka adlaw nga kalihukan ang umalabot nga Palarong Pambansa 2026 karong Mayo nga himuon sa Agusan del Sur tungod kay tutukan man nila ang paghimo og mga palisiya nga makatabang pagpalambo sa edukasyon sa kabataang Filipino.
