BUTUAN CITY – Pormal nang gipasakaan og bag-ong reklamong cyberlibel ug perjury ni National Security Adviser Eduardo Año sa Department of Justice (DOJ) kagahapong adlawa, Miyerkules ang 18 nga nagpailang kanhe miyembro sa Philippine Marines ug ang abogadong si Atty. Levito Baligod.
Ang maong lakang gihimo usa ka semana human gihaon ni Año ang iyang unang reklamo tungod sa paglambigit kanya sa isyu sa matud pa binulto-bultong kwarta gikan kang kanhe Magbabalaod Zaldy Co.
Sumala ni Año, gi-angkon mismo sa abogado ang pagmanipula sa mga gisubmiteng pamahayag.
Giakusahan ang kalihim nga midawat og paper bag human ang usa ka tigom sa Polo Club townhouse kauban sila Co, kanhe Speaker Martin Romualdez, ug Mamamayang Liberal Representative Leila De Lima.
Gitin-aw ni Año nga ang ikaduhang reklamo mas personal kumpara sa nahiunang gipasaka nga nagkatutuk sa pagpakaylap sa fake news
Gipunto usab ni Año nga walay gitumbok sa joint affidavit kung kinsa ang direktang nakakita sa mga pasangil batuk kanya.
Nagtoo ang kalihim nga dunay duha ka indibidwal nga anaa sa likod sa paglambigit sa iyang pangalan, bisan og mibalibad siyang ipublikar ang pagkatawo sa mga niini.
Samtang gipahayag sa kalihim nga gisilib na usab sa gobyerno ang posibleng kunsabohay aron pahagsaon ang gobyerno.
Kung mahinumduman, niadtong nakalabay nga semana, unang giakusahan ni Año sila Baligod, ang mga nagpa-ilang kanhe Marines, ug kanhe Congressman Mike Defensor sa paglapas sa Article 154 sa Revised Penal Code mahitungod sa Cybercrime Prevention Act of 2012.
