BUTUAN CITY – Hangtud sa pagkutlo niini nga balita, wala pa’y nadawat nga guidelines ang lungsod sa Nasipit, Agusan del Norte kalabot sa pagpabalik na sa ‘Balik Probinsya Program’ ning rehiyon sa Caraga sukad mi-expire ang moratorium niini niadtong Hulyo 4.
Sa eksklusibong pakighinabi sa Bombo Radyo Butuan, gipadayag ni Nasipit Municipal Mayor Enrico Corvera nga wala pa sila ma-abisuhi kalabot sa pagpanguli na sa ubang mga locally stranded individuals kon LSIs ug mga Returning Overseas Filipinos kon ROFs gikan sa nagkada-iyang siyudad sa nasud.
Hinuon, andam na sila sa pagbalik na unya sa maong programa tungod kay susamang mga health protocols gihapon ang ilang ipatuman higayong duna na’y mangabot sa ilang pantalan.
Gani, mag-andam na sila og ilang mga rapid test kits aron ma-test na ang mangabot unya nga mga LSIs ug mga ROFs. Pinaagi matud pa niini, mahiluna silang in-charge sa pag-atiman sa mga LSIs ug mga ROFs nga ang ilang pangbuhian nga mga pasahero, negatibo sa COVID-19.
Susama matud pa kini nga lakang sa ilang gihimo sa mga taga-Nasipit nga gikan sa mga dagkong siyudad sama sa Manila ug Cebu nga manguli sa ilang lungsod.
Gikan sa pantalan, i-rapid test una sila ug ideretso na sa 14 ka adlaw nga quarantine ngadto sa ilang quarantine facility hangtud nga mu-abot na ang adlaw nga mamahimo na silang mupa-uli sa ilang tagsa-tagsa ka panimalay.
