BUTUAN CITY – Gihulat na lang ni Mayor Enrico Corvera sa Nasipit, Agusan del Norte ang executive order nga ipagawas sa nasudnong kagamhanan alang sa pagpa-ilalom sa pipila ka mga lugar sa nasud sa enhanced community quarantine ug sa general community quarantine.
Kini aron uniform tanan sa pagpatuman sa mga palisiya diin malakip ang ilang lungsod og tibuok Caraga Region sa GCQ.
Sa eksklusibong pakighinabi sa Bombo Radyo Butuan, gipadayag ni Mayor Corvera nga sa iyang kabahinan, sama sa iyang mga coinstituents, gusto na usab niyang malu-ag lu-agan na ang gipatumang ECQ aron makagawas na sa ilang pinuy-anan ang mga tawo sa ingon subli nang makalihok-lihok alang sa ilang inadlaw-adlaw nga panginabuhian sa ingon dili na magsalig pa sa ayudang ihatag sa local nga kagamhanan.
Samtang sa pagbalik usab sa operasyon sa ilang pantalan, giklaro sa mayor nga mag-agad gihapon kini sa ipagawas nga protocol sa Inter-Agency Task Force.
