BUTUAN CITY – Miabot na sa lima ka mga rebelding New People’s Army kon NPA ang namatay sa natigayong engkuwentro bag-ohay lang sa may Mt. Apo-apo sa Sitio Dugyaman, Barangay Anticala, Butuan City.
Kini human nakarekober pa og duha ka patay’ng lawas ang kasundaluhan nga mihimo og clearing operation.
Sumala ni LT.Col. CRESENCIO C GARGAR, Commanding Officer sa 29th Infantry Batallion, Philippine Army, giklaro niining natigayon ang engkwentro niadtong Hunyo 16 tali sa ilang tropa kauban ang 30th Infantry Battalion batuk sa NPA. Sa clearing operation, narekober ang tulo ka patay’ng lawas sa mga rebelde diin napakanaog ang mga niini sa adlaw nga sabado.
Sumala pa ni Lt. Col. Gargar nga nagpadayon ang ilang clearing operation diin pagka-Domingo subling nakarekober ang tropa og laing duha ka patay’ng lawas sa rebelde.
Samtang miabot usab sa 16 ka mga tag-as nga kalibre sa armas ang lakip sa narekober sa kasundaluhan. Kini gilangkuban sa unom ka AK47 Rifle, upat ka M4 Assault Rifle, upat ka M16A1 Rifle og duha ka 40mm Grenade Launchers. Giklaro usab niini nga dunay mga libro silang nakuha diin dunay mga pangalan nga nalista, kansa maoy sunod nilang adtoon,aron ma-clear ang ilang ngalan.
Sigon sa opisyal nga gihimo nila ang hiniusang operasyon tungod sa taho sa mga sibilyan nga dunay daghang mga rebelde sa maong lugar diin mihimo og pagpangilkil ilabina sa mga negosyante.
Mapasalamaton usab kini sa mga residente nga mitabang usab sa pagpakanaog sa maong mga patay’ng lawas nga anaa gipahimutang sa usa ka punerarya.
Mihangyu nalang si Lt. Col. Gargar sa katawhan nga basin dunay mga samaron nga modool kanila, nga gelayong ipahibalo sa lokal nga opisyales aron kini matambalan. Kini human gikumpirma sa opisyal nga perteng daghana sa mga dugo sa lugar nga nahitaboan.
