BUTUAN CITY – Pasakaan og tukmang kaso sa kapulisan sa lungsod sa Mainit, Surigao del Norte uban sa Department of Trade and Industry kon DTI-Caraga ang usa ka lalaking namaligya og balor sa 48,800-pesos nga kantidad sa imported nga mga pekeng sigariyo.
Kini human siya nadakpan sa kapulisan pasado alas-2:30 sa hapon niadtong Dominggo human gisumbong sa mga tawo didto sa Purok Lily, Barangay San Isidro sakop sa maong lungsod.
Naila ang dinakpan nga si Jessie Gimang Villarmino, 38-anyos, taga-Purok 3, Barangay Kapatungan, Trento, Agusan del Sur.
Sa eksklusibong pakighinabi sa Bombo Radyo Butuan, gipadayag ni PMajor Dorothy Tumulak, tigpamaba sa Surigao del Norte Police Provincial Office, migawas sa ilang imbestigasyon nga magduha ka semana na diay nga namaligya sa mga kontrabandong sigarilyo ang suspek.
Gi-opirisyunan kini human nga duna na’ mga concerned citizens nga misumbong sa kapulisan kalabot sa maong modus.
Sa pagkakaron, nagkuha na og mga samples ang kapulisan sa Mainit ug gidala ngadto sa Department of Trade and Industry kon DTI aron masusi ang ka-genuine niini kung safe ba nga ibaligya ngadto sa publiko.
