BUTUAN CITY – Positibong gi-ila sa ilang mga ginikanan ang duha ka mga rebeldeng New People’s Army nga gitu-uhang napatay atol sa engkwentro tali sa militar ning mi-aging buwan og gilubong na lang sa ilang mga ka-ubanan atol sa ilang pagsibat.
Kini human gikalot ang gilubngan sa mga biktimang sila Reynel John Agoncillo, 20-anyos nga taga-brgy. Lower Olave, Buenavista, Agusan del Norte og Jemar Martinez, 22-anyos og residente sa Marbon, Talacogon, Agusan del Sur.
Nasayrang gikalot ang ilang na-decompose nang patay’ng lawas sa Sitio Hinandayan, Brgy. Camagong, lungsod sa Nasipit, Agusan del Norte.
Gikumpirma usab sa mga ginikanan sa duha nga mga membro sila sa Guerilla Front Committee 4-A sa NPA og nasayran nila ang ilang nadangatan human matud pa nagbilin og sketch diha sa ilang balay ang mga ka-ubanan niini sa lugar nga ilang gilubngan dungan sa ilang pagsibat. (Beth Ruiz)
