BUTUAN CITY – Gimando na ni Butuan City Mayor Ronnie Vicente Lagnada ang pagpabarog og balik sa nahugmak nga wooden bridge sa Brgy. Babag aron duna lama’y kaagi-an ang mga tawong manabok sa duha ka tampi.
Sa pakighinabi sa Bombo Radyo Butuan, gipadayag ni Butuan City Councilor Vincent Rizal Rosario, chairman sa Committee on Infrastructure sa Sangguniang Panlungsod, nga dihang nahugmak ang maong tulay ning mi-aging semana, gimando gilayon sa mayor ngadto sa City Engineering Office ang pag-inspeksyon niini pagpanguna ni Engr. Montero.
Gidugang pa ni Konsehal Rosario nga plano matud pa sa CEO nga repiron ang maong tulay karong bulana apan tungod sa pandemya, na-alanganin ang pagtrabaho niini tungod sa kakulang usab sa mga tawo hangtud nga naabtan na kini sa pagkahugmak
Duna usab matud pa’y plano ang CEO alang sa mas durableng tulay aron usab maagi-an kini sa mga sakyanan pinaagi sa pagpa-4 lanes niini aron mariyalisar ang plano ni Mayor Lagnada pag-construct na og by-pass roads padulong sa Brgy. Lumbucan og Masao.
