BUTUAN CITY – Nagpadayon pa ang imbestigasyon sa mga sakop sa Bayugan City Police Station subay sa nahitabong pagpusil ngadto sa usa ka Indian National kagahapong adlawa.
Sa pakighinabi ning sibyahan, gi-ila ni P/Chief Insp. Darwin Yu, hepe sa Bayugan City Police Station, nga naila ang biktima nga si Ranjit Raju Sayl, 34, menyo ug residente sa Brgy. Holy Redeemer, ning syudad sa Butuan.
Sumala sa imbestigasyon, samtang pa-sakay matud pa sa iyang single-motor ang biktima aron maningil sa iyang negosyo nga pautang sa nasangpit nga lugar, kalit matud pa kining gipusil sa wala mailang suspetsado nga nakasakay usab ug single-motor.
Sigon niini nga base sa kuha sa CCTV, nakasuot matud pa ug jacket ug nakakalo ang suspek nga maoy mipusil sa maong biktima. Nakadawat ug usa ka samad-pinusilan sa iyang ulo ang nasangpit nga biktima kinsa daling gidala sa tambalanan aron matambalan.
Narekober gikan sa crime scene ang usa ka fired cartridge sa kalibre .45 nga pistola nga gitu-uhang maoy gigamit sa pagpamusil. (Mon Aplaya)
