BUTUAN CITY – Pursigidong mopasaka og kaso ang pamilyang Sajulan batuk sa kadre nga nakapusil-patay sa nag-maoy nga sibilyan kaganinang ala-1:30 sa kaadlawon sa Barangay Jaguimitan, Nasipit, Agusan Del Norte.
Naila ang biktima nga si Gary Sajulan, 42-anyos, dunay kapuyo ug residente sa Purok-1, sakop sa maong barangay samtang ang nakapusil mao si Sgt. Jufil Ateg, detachment commander sa Jaguimitan Patrol Base nga sakop sa 23rd Infantry Battalion, Philippine Army.
Sumala ni Melanie Sajulan Lauro, igsoon sa biktima, gusto niyang makab-ot ang hustisya sa kamatayon sa iyang igsoon tungod kay sobra ra matud pa angpagpusil sa iyang igsoon ug wala matud pa mihimo og aksiyon aron ma-pin down lang ang iyang igsoon.
Nagtoo siya nga overkill ang nahitabo tungod kay sa ilang nakita, muabot sa 5 ka mga samad-pinusilan ang na-angkon sa biktima nga maoy hinungdan sa iyang hinanaling kamatayon.
Dugang pa ni Melanie, kung gi-pin down lang unta matud pa ang biktima, ila pa kining mapatambalan og mabutang sa rehab aron maulian ang usahay pagkawala sa saktong panghuna-huna.
Gipanghimakak usab niini nga nakapabuto ang iyang igsoon sa armas nga nailog gikan sa CAFGU member nga sukwahi sa pamahayag usab ni Sgt. Ateg
Samtang gibutyag usab ni Sgt. Ateg nga sakit sa iyang boot nga pusilon ang biktima apan wala na matud pa siya’y mahimo tungod kay mas daghan pang sibilyan ang posibling madamay ilabina kay kini mipabuto na sa nailog nga armas.
Nasayran nga nagpahigayon og Alumni Homecoming kagabii isip pagselebrar sa kapistahan sa Barangay Jaguimitan, nasipit, Agusan Del Norte ugmang adlawa.
Tungod sa maong hitabo, nadisesyonan sa Barangay Council nga wala nay mahitabong disco unya og ugma sa gabii.
Saysay ni Sgt. Ateg , unaing gitigbas ni Sajulan ang CAFGU member nga si Riel Llido diin duna kini gamay nga samad sa likod nga bahin adiser nailog ang armas.
