BUTUAN CITY – Hugot nga gidepensahan sa hepe sa kapulisan sa Nasipit, Agusan del Norte ang pagpusil-patay sa usa sa iyang mga sakop ngadto sa lalaking nagmaoy nga gikalisang sa mga residente sa Brgy. Camagong.
Kini subay na sa pagkwestyon sa pipila ngadto sa pagpusil kang Rizalito Danuco nga miresulta sa iyang kamatayon.
Sa eksklusibong pakighinabi ning sibyahan, gipadayag ni P/Sr. Insp. Doris Aguob nga nagpadala siya og duha niya ka mga sakop niadtong Sabado sa hapon ngadto sa District 2, Brgy. Camagong tungod sa gipangayong police assistance ni Benito Bernasor.
May kalabutan kini sa pagmaoy ni Danuco kinsa gawas nga nagdala og bara, mibato pa sa usa ka tindahan sa maong lugar og dili na mapugngan.
Nagpa-ila matud pa gilayon ang wala una panganling mga pulis apan gisumbag kini sa suspek og gihanaan pa og tira og bara hinungdan sa natigayong ginukdanay.
Tungod kay alanganin na matud pa ang mga pulis, gipusil nila kini sa maka-upat ka higayon nga miresulta sa iyang kamatayon. (Beth Ruiz)
