BUTUAN CITY – Tumang kalipay ang gibati sa usa ka music teacher sa Brgy. Inayawan, Cebu City human nasulod sa semifinal round sa 3rd Bombo Music Festival ang ginama niyang kantang ‘Hanap-hanap’ kon dili klaro nga sa Ingles pa, blur.
Sa eksklusibong pakighinabi sa Bombo Radyo Butuan, gibutyag ni Florante Pace nga karong tuiga lang siya nagka-interest nga magsulat og kanta human niya nahuna-hunaan nga masayang lang ang iyang gi-eskwelahan kung matanggong pang kini sulod sa tunghaan diin walo ka tuig siyang nagtudlo.
Nagdesisyon siyang biyaan ang pagtungha aron lang matuman ang iyang passion sa musika rason nga nagsugod na siya pagsalmot sa ingon niini nga kompetisyon dihang iya kining nadunggan sa Bombo Radyo Cebu.
Sa pagkakaron, walo ka mga kanta na ang iyang na-compose og apil na nini ang iyang entry nga kantang ‘Hanap-Hanap.’
Nakuha niya ang ideya sa maong kanta diha ra usab sa kasinatian sa iyang mga higala kondiin tungod sa kadugay na nila sa gisudlan nilang relasyon, nagkapupos ang pagpakita nila sa ka-init sa gugma ngadto sa ilang partner sukwahi sa pagsugod pa lang nila niini.
Mipabati pa kini og tipik lang sa tono sa maong kanta.
