BUTUAN CITY – Nadiskubrehan nga nagkadaghan ang mga barkong panggiyera ug fighter jets sa Amerika duol sa Iran samtang gipresyur sa US ang Iran tungod sa military program niini ug sa pagdakop ug pagpatay sa mga nagprotesta.
Lakip sa nasigpatan ang USS Abraham Lincoln nga aircraft carrier, uban ang tulo ka missile destroyers ug 90 ka eroplano nga anaa sa Dagat sa Oman, mga 700 kilometro gikan sa Iran.
Nagpahibalo usab ang US nga ipadala ang USS Gerald R. Ford, ang pinakadakong barkong panggiyera sa kalibutan, padulong sa Middle East sulod sa tulo ka semana.
Magkita ang mga opisyal sa Amerika ug Iran sa Switzerland aron hisgutan ang tensiyon sa ilang duha ka nasod. Sumala sa Iran, hisgutan nila ang nuclear program niini ug ang posible nga pagtangtang sa economic sanctions nga gipahamtang sa US.
