BUTUAN CITY – Malampusong nahusay ni Kapitan Vincent Rizal Rosario sa Brgy Libertad ning siyudad sa Butuan ang duha ka tricycle transport cooperatives ug mga sakop sa City Transportation and Traffic Management Department kon CTTMD human nagkasungi dihang gisulayan ang pag-dry run unta sa bag-ong ruta nga ipatuman.
Sa eksklusibong pakighinabi sa Bombo Radyo Butuan, gipadayag ni Kapitan Rosario nga bugtong ang ilang de-pasayruang mga motorized trisicad nga sakop sa Libertad White Transport Cooperative kon LWTC ang na-aprubahan nga makabiyahe sa ruta nga gitagana kanila tungod kay wala matud pa naka-apply ang Villa Kananga Drivers Transport Cooperative kon TRANSCOVIL.
Dihang sugdan na unta ang dry run aron sutaon kung gikan sa inisyal nga pito ka yunit, pila ka unit sa motorized sicad ang makapamasada human ang gihimong survey niadtong tuig 2023.
Sunod-sunod nga meeting na matud pa ang ilang gilusad aron maplastar ang tanan apan wala na madayon tungod sa komosyon nga hatud sa pipila ka mga isyung wala maresolba ilabina sa grupo sa Libertad Motorized Tricycle Operators and Drivers Association pagpanguna sa ilang presidente nga si Richard Angao Jr.
Nahusay matud pa ang duha ka grupo uban sa representante sa CTTMD dihang gipadayag ni Angao nga makigkita siya kang Mayor Law Fortun aron mapasabot ang ilang panig tungod kay dili sila mutugot nga mapahawa sa maong ruta tungod sa kadugay na matud pa nilang nagbiyahian sa maong ruta.
Giklaro usab ni Kapitan Rosario nga nagpamembro ang grupo ni Angao ngadto sa TRANSCOVIL ug adiser pa nasuta nga wala matud pa’y aplikasyon nga gipasa sa maong grupo ngadto sa CTTMD rason nga wala’y naproseso.
Sa pagkakaron, hulatan na lang nila ang mahimong resulta sa pagpakigkita sa maong reklamanteng grupo ngadto kang Mayor Fortun adiser muhimo og dugang aksyon.
