BUTUAN CITY – Gipasidunggan sa Butuan City government kagahapong adlawa ang nag-viral nga traffic enforcer human nga wala niini lung-i ang panel truck driver nga nakalapas sa balaud sa trapiko ug misulay pa pagsibat rason nga mikapyot sa atubangang bahin sa sakyanan ang enforcer.
Gitunol kang Ernie Abasula ang Gawad Kagitingan Award atol sa gipahigayong press conference sa buhatan sa City Transportation and Traffic Management Department kon CTTMD-Butuan. Gidayeg sa city government ang dedikasyong gipakita ni Abasola sa iyang kinabuhi ilabina nga delikado alang sa iyang kinabuhi ang iyang gihimo.
Gipadayag ni Abasula ang iyang kabalaka ug kahadlok atol sa maong panghitabo, apan gibarugan niyang ang iyang gibuhat nga kabahin sa iyang trabaho. Giklaro usab niini nga wala siya magdahom og bisan unsang ganti tungod kay alang kaniya, tungod lamang kini sa iyang katungdanan isip usa ka traffic aid.
Dugang pa ni Abasula, bisan og iyang gihimo ang iyang katungdanan apan gi-ampingan usab niya ang iyang kaluwasan atol sa maong hitabo.
Mensahe lamang niini ngadto sa mga mibatikos kaniya online, nga wala matud pa sila kasayod kung unsa gayod ang trabaho sa usa ka traffic aid, mao nga makahuna-huna matud pa sila og daotan mahitungod sa iyang trabaho.
Sumala pa ni Abasula, wala siyay tuyo nga mukapyot, apan napugos siya tungod sa kalit nga aksyon sa drayber ug alang sa iyang kaluwasan.
Samtang gipadayag usab ni Butuan City Mayor Law Fortun ang iyang suporta sa traffic enforcer nga nalambigit sa kontrobersyal nga insidente kinsa nagpakita sa iyang kaisog apan nakadawat gihapon og kasaba gikan sa katawhan.
Gisaysay usab sa mayor, nga ang insidente usa ka pahinumdom sa importansya sa disiplina sa dalan ug respeto sa mga otoridad nga nagtuman sa ilang katungdanan.
