BUTUAN CITY – Aminado ang nag-viral nga med tech sa Adela Serra Ty Memorial Medical Center sa Tandag City, Surigao del Sur nga niadtong nakuhaan siya og hulagway sa iyang ka-uban nga si Stefan Balani, mibati gihapon siya ug kakulba dihang nakita ang mi-ulbong kalayo sa pikas hospital complex.
Apan mas gipili niyang kalmahon ang iyang kaugalingon ug gihuna-huna ang angayang buhaton ilabina nga anaa na siya sa tunga-tunga sa iyang gitrabahong blood cross-matching alang sa dugong i-abuno sa bag-o pa lang natawong bata tungod sa kagamay na lang sa dugo niini.
Sa eksklusibong pakighinabi sa Bombo Radyo Butuan, gipadayag ni Jeia Gungue nga daw pagbuot matud pa sa Kahitas-an ang tanan tungod kay dihang nadeklara na ang fire-out, gi-follow-up gilayon kaniya sa taga-Newborn ICU ang resulta sa iyang trabaho rason nga na-abunuhan gilayon og dugo ang unom ka adlaw pa lang nga bata.
Misamot ang iyang kalipay tungod kay ang laboratoryong iyang nahimutangan, wala man malakip pagkasunog taliwa nga hapit na kining ma-abot sa kalayo human nga gipasasan pagpalot sa mga bombero.
Samtang gipadayag usab ni Balani nga ang pag-boost sa pagsalig sa kaugalingon ning panahon sa pandemya, mao matud pa’y tamdan sa tanan aron mahimo ang ilang trabaho taliwa sa hulga nga ilang mabangalan.
Kini ang mensahe ni Stefan Balani, ang medtech nga nag-upload sa nag-viral nga ka-uban niyang si Guingue tungod kay katuyuan lang niya sa pag-upload sa kuha niyang hulagway ni Jeia Guingue mao lang unta ang pag-inspire sa ilang mga ka-ubanan ug mga kahigalaan nga sa ingon niini nga panahon, duna pa’y mga tawong dedicated sa ilang trabaho, bisan og posibleng mabutang sa delikado ang ilang kinabuhi.
