BUTUAN CITY – Human gisunod-sunod tungod sa iyang nationality ug napugos pag-drop out sa Miss South Africa beauty contest, gikoronahan si Chidimma Adetshina sa lahi nga nasud. Nakahilak sa kalipay si Adetshina human midaog isip Miss Universe Nigeria kagahapong adlawa. Sigon sa 23-anyos nga law student, ang iyang nakab-ot nga korona, dili lang lang sa ka-anyag kondili alang usab sa panaghi-usa.
“This crown is not just for beauty; it’s a call for unity,”
Chidimma Adetshina
Nasayrang gi-imbitar siyang mu-apil sa Miss Universe Nigeria human nga ang iyang pagka-finalist sa Miss South Africa, mi-ani og mga pagbatikos human gikwestyon sa uban ang iyang eligibility nga mu-compete sa beauty pageant tungod kay bisan pa man sa iyang pagka-South African citizen, ang iyang amahan usa man ka Nigerian samtang ang iyang inahan, naggikan usab sa Mozambique.
Sa mga interviews, gipadayag ni Adetshina nga natawo siya sa Soweto – ang lungsod sunod sa Johannesburg ug nagdako siya sa Cape Town. Ang kontrobersiya sa iyang nationality misangpot sa imbestigasyon sa mga organizers sa Miss South Africa kondiin gitahasan nila ang ilang Home Affairs Department, paglantaw sa iyang eligibility. Nasuta sa departmento nga ang iyang inahan, nakakomitar og “identity theft” aron mahimong South African national. Apan gidugang sa ilang written statement nga wala’y labot si Adetshina sa nahimo sa iyang inahan tungod kay bata pa kaayo siya niadtong higayuna. Dinhi na siya nag-drop out sa kompetisyon tungod ug alang sa kaayuhan sa iyang pamilya.
Human nabani-og ang istorya ni Adetshina, gi-imbitar siya sa mga organisers sa Miss Universe Nigeria aron marepresenta niya ang lumadnong yuta sa iyang amahan diha sa international stage. Human sa iyang kada-ugan, dalhon ni Adetshina ang Nigeria sa Miss Universe 2024 competition nga himuon karong Nobyembre.
Maka-agbat unya niya ang midaug sa Miss South Africa nga si Mia le Roux human siya nag-drop out sa maong kompetisyon. Nasayrang si le Roux mao ang unang bungol nga babaye sa kasaysayan nga midaog sa maong korona.
