BUTUAN CITY – Dili palabyon sa Police Regional Office kon PRO-13 nga ipailalom sa rapid testing alang sa pagsunod sa health protocols ang mga nadakpang sila Kabus Padtoon kon KAPA Community Ministry International Incorporated founder Joel Apolinario, asawa niining si Reyna og lain pang 24.
Kini gawas pa sa pagpa-ilalom kanila sa paraffin test aron matumbok kung kinsa kanila ang nakapabuto og armas atol sa joint law enforcement operation nga misangpot ngadto sa kapin duha ka oras nga giyera hangtud sa malampusong pagkasikop kanila.
Sigon ni PRO-13 regional director BGen. Joselito Esquivel Jr., ang matumbok sa paraffin test result nga nagpabuto, pasakaan na usab og laing kaso.
Sigon sa opisyal, kagahapon pa lang dihang ila nang gipresenta ngadto sa mga tigbalita ang mga dinakpan, ila nang gi-obserba ang social distancing sa mga dinakpan kinsa gipasuot usab nila og face mask.
Ang magpositibo sa rapid test ila gilayong i-isolate aron mapa-ilalom na usab sa swab test sa ingon mas ma-atiman ang ilang panglawas og madala na sa quarantine facility ning siyudad.
