BUTUAN CITY – Gikumpirma ni PLt. Crispulo Alburo, tigpamaba sa Butuan City Police Office nga cardiac arrest ang gikamatyan sa suspek sa ilang gikasang buy-bust operation bandang alas 6:55 ang takna sa nakalabay nga gabii sa Barangay Pigdaulan, Butuan City.
Sigon sa opisyal samtang ginahimo ang pag-aresto sa suspek nga si alyas Gaga, 50-anyos og residente sa maong dapit, kalit kining naluya og nawad-an sa panimoot.
Dali nga miresponde ang ambulansya sa Regional Health Service 13 ug gihatod kini sa Butuan Medical Center alang sa emerhensyang medikal nga pag-atiman apan sa wala damha nakabsan kini sa iyang kinabuhe.
Tungod sa wala damhang panghitabo nagpaabot na og pahasubo ngadto sa pamilya ni alyas Gaga ang kadumalahan sa Butuan City Police office sa pagpanguna ni Police Col. Villamor.
Sumala usab ni Police Lt. Alburo nga usa ka high-value individual ang suspek diin sa maong operasyon nakumpiska ang gibana-banag 25 gramos sa shabu nga nagkantidad og 170-mil ka pesos.
Ang suspek usab kanhe nang nadakpan tungod gihapon sa kalapasan sa RA 9165 o Comprehensive Dangerous Drugs Act of 2002.
