BUTUAN CITY – Temporaryo nang gawasnon si kanhi Negros Oriental Governor Pryde Henry Teves, ang igsoon ni kanhi Congressman Arnolfo Teves Jr. human nakapyansa og 200-mil pesos.
Kahinumduman nga nasikop ang maong gobernador bandang alas 8:15 ang takna sa buntag kagahapong adlawa, sa may Dr. Vicente Locsin St., Brgy. Taclobo, Dumaguete City, Negros Oriental.
Ang pagsikop sa maong opisyal, mugna sa napamatud-ang paglapas niini sa Terrorism Financing Prevention and Suppression Act of 2012.
Si Pryde Henry, numero uno sa listahan sa mga wanted person sa Provincial ingon man Regional Level.
Nakapyansa kini tungod kay ang gibasehan sa iyang kaso mao man ang balaod man nga napasar niadtung 2012, samtang ang Anti-terror law nga gipermahan ni kanhi Pangulong Rodrigo Duterte, mahimo kining madetine sulod sa 24 ka mga adlaw bisan wala pa napamatud-i ang kaso batok niini.
Kahinumudumang niadtung Agosto, gideklarar sa Anti-Terrorism Council (ATC) ang managsuong Teves ug laing 12 ka mga indibidwal isip terorista tungod sa pagkalambigit nila sa pagpatay ug pagpanghasi sa mga taga-Negros Oriental, ingon man sa dayag nga pagpatay kang Negros Oriental Governor Roel Degamo niadtong Marso 2024 nga miresulta usab sa kamatayon sa pipila ka mga inosenteng sibilyan.
