BUTUAN CITY – Muabot sa halos 20 ka mga sakyanan ang bulontaryong mikuha sa mga na-trap nga mga estudyante sa Marawi State University kon MSU human gisulong sa teroristang Maute Group ang siyudad niadtong Mayo 23..
Nasayrang ang maong pagpangatake sa terorista ang nagtuklod ni Pangulong Rodrigo Duterte sa pagdeklara ug martial law sa tibook Mindanao.
Sigon ni Avon Villacurte Vertico-magtutungha sa MSU ug kasamtangan karung nabakwit na sa Iligan Institute of Technology sa Iligan City, dunay mga jeep, van ug dagkong multicab ang boluntaryong nagkuha kanila didto sa unibersidad ug kinahanglan usab nga magconvoy tag duha o tulo ka sakyanan.
Sa pagkutlo ning balita kagabii halos 200 na matud pa ka estudyante ang nabakwit karun sa Iligan City. Giklaro nalang ni Vertico nga ang MSU-Campus ang pinakaluwas mga dapit sa Marawi City apan kinahanglan gihapon silang mobiya niini aron dili ma-ipil sa giyera.
Miabot usab sa 8 ka oras ang ilang biyahe tungod sa kadaghan sa mga checkpoints diin ang matag-usa kinahanglang kapkapan.
Apan duna pa gihapoy nabilin nga mga estudyante sa MSU hinungdang lauman ang padayun nga pagkuha sa mga niini karung adlawa.
Miapela nalang si Vertico ug tabang aron makapauli ang mga estidyante sa ilang tagsa-tagsa ka dapit ilabina kay duna matud pay walay mga pamasahe.
Sa kabahinan matud pa ni Vertico nga taga San Francisco, Agusan Del Sur, duna nay misaad nga mukuha kanila. (Rolan Janea)
