BUTUAN CITY – Padayon pang gipangita sa kapulisan sa Cabadbaran City uban sa mga sakop sa Philippine Coast Guard ang nahanaw nga si Nelmar Viray, ang magtutudlo sa Tagbungabong Elementary School sa lungsod sa RTR, Agusan del Norte kinsa niadto pang Dominggo sa hapon na-missing.
Sa esklusibong pakighinabi sa Bombo Radyo Butuan, gipadayag ni PMajor Renel Serrano, hepe sa Cabadbaran City Police Station, nga anaa na sa ilang kostudiya ang mga persons of interest nga sila Macky Tañola, residente sa Moncayo, Davao de Oro ug barkada niining si Bryan Phil Coquilla nga taga-Cabadbaran City.
Kini human sila unang mitahan ngadto sa kapulisan sa Trento, Agusan del Sur dihang gi-agni sa igsoon ni Macky nga si Jessica Tañola, residente sa Purok 3, Brgy. Langkilaan, Trento nga mutahan na.
Sigon ni Serrano, mi-angkon ang duha nga sila ang responsable sa pagkahanaw ni Viray.
Migawas sa ilang imbestigasyon nga duna matud pa’y relasyon si Viray ug si Tañola kinsa nagpa-uban sa iyang barkadang si Coquilla alang sa ilang first date kondiin uban matud pa silang midalikyat sa baybay sa Brgy. Caasinan ug mibalhin sa Brgy. Tolosa diin sila nagdugay.
Saysay matud pa sa duha, dihang naligo na og dagat sila Viray ug Tañola, mihangyo ang biktimang gamiton niya si Tañola nga gibalibaran niini kansa miresulta matud pa sa ilang panaglalis hangtud nga nagsumbagay.
Una matud pang gilumsan ni Viray si Tañola ug dihang nakita sa barkadang si Coquilla, iya kining gitabangan bitbit na ang kutsilyo ug dinhi na gitabangan og lumos ang magtutudlo ug giluba dayong guyod niini hangtud sa giladmong taga-liog ug ila nang gipa-anod.
Dali silang misibat sakay sa motorsiklo sa biktima ug gi-abandona na nila sa minteryong bahin sa Brgy. 12 sa maong siyudad.
