BUTUAN CITY – Tungod sa tabang sa kapulisan, nahi-usa na sa iyang mga ginikanan ang 6-anyos nga batang lalaking Egyptian kinsa na-missing sa Tandag City, Surigao del Sur.
Sigon ni Brigadier General Gilberto DC Cruz, director sa Police Regional Office (PRO) 13, nabalik na sa iyang amahanang si Ali Muhammed si Abdullah Ali Muhammed pasado alas-5:30 ning mi-aging hapon sa Tandag City Police Station.
Nasayrang nakit-an si Abdullah sa usa ka concerned citizen nga nagsuroy-suroy sa Osmena St., Brgy. Bag-ong Lungsod, sakop sa maong siyudad pasado alas-tres sa hapon.
Sigon ni Lieutenant Colonel Jeffrey Lawrence Mauricio, ang hepe sa Tandag City Police Station, daling gi-post sa iyang mga sakop sa social media ang na-turn over nga bata hangtud nga nakuha gilayon kini sa iyang mga ginikanan.
Nasuta pa nga usa ka semanang nagbakasyon sa Pilipinas ang pamilya.
Aminado ang mga ginikanan sa bata nga wala nila nabantayan ang kalit lang nga pagbiya sa bata sa panimalay.
