BUTUAN CITY – Sabutan pa sa Regional Personnel Holding Administrative Office kon RPHAO og sa R-1 sa Police Regional Office kon PRO-13 ang aksyong ipatuman batuk sa na-demote na nga si P/Insp. Zosimo Torrecampo.
Kini human nga mi-abot na sa maong buhatan ang gihimo niini ngadto kang PO1 Randell Abellanosa Pulios kagabii hinungdan sa pagkabun-og niini.
Nasayrang midangop sa Butuan City Police Station 3 si PO1 Pulios human matud pa siya gikulata sa hubog nga suspek dihang naka-abot sa ilang boarding house pasado alas-nueve kagabii samtang nanglaba siya sa iyang uniporme.
Sa eksklusibong pakighinabi ning sibyahan, gikumpirma ni P/Sr. Supt. Arthur Sanchez- hepe sa RPHAO nga anaa na nadestino sa Regional Headquarters Service Group kon RHSG si Torrecampo human na-demote isip aksyon sa reklamong gikan sa kanhi provincial director sa Surigao del Norte Police Provincial Office tungod sa insubordination.
Nasayrang mu-graduate na unta si Torrecampo human ang usa ka buwan niyang pagpa-ilalom sa Character and Aptitude Development Training and Learning Fitness isip kabahin sa pagpa-ilalom kaniya sa imbestigasyon. (Beth Ruiz)
