BUTUAN CITY – Gikumpirma ni Atty. Froilan Montero, legal council ni Barangay Ampayon, Butuan City Kapitan Rodencio Basubas jr nga anaa pa sa detention facility sa Butuan City Police Station-4 ang kapitan human gisikop sa entrapment operation sa nakalabay nga adlaw.
Sigon ni Atty. Montero nga kagahapon gihimo ang inquest proceedings didto sa piskalya diin gipangayuan sila og counter arguments. Pasabot pa sa abogado nga wala na sila nag-waiver aron sa ingon dili mobalik sa preliminary investigation ug dili makapangandam ang complainant.
Ugmang adlawa kinahanglang magduso na og impormasyon ang complainant. Magpasaka usab sila og bill of paritculars nga seguradong dili makahatag og positibong tubag ang kampo sa complainant rasong dili na ma-establisar ang kasong estafa. Moresulta usab sa sayung pagka-dismiss sa kaso.
Gipamugos ni Atty. Montero nga walay kremin nga nahitabo tungod kay dunay special power of attorney nga gihatag mismo sa tag-iya sa yuta gawas pa sa resolusyon nga gihimo sa regular session.
KUng dunay angayan may kasuhan dili si Kapitan kundi ang nagbayad nga gamit ang pekeng mga kwarta.
Gipahayag usab sa abogado nga makabalik na sa trabaho isip kapitan sa barangay Ampayon si Basubas jr tungod kay ugmang adlawa maghatag sila og piyansa alang sa temporaryo niining kagawasan.
Magduso usab sila og Malicious Prosecution tungod sa pagpataka-taka og kaso o pagditini sa tawong inosente sa kaso.
